見工（Programmer）心得
又踏入見工嘅季節，無論係大學生都在職人仕，黎緊都可能會見工，所以我希望喺度分享下我嘅心得。
本🐷一路都好鍾意見工，因為成日都會學到唔同嘅嘢、知道自己嘅不足同最重要係會知道自己嘅市值。而我大大話話見過都有十幾間大大小小唔同規模同field嘅公司（programmer role）了，除咗啱啱出黎（第一年）嗰時有部分見完冇回音外，每次in完都會有offer😎。沾沾自喜下刪過萬字。。。
同時喺近依一兩年，我有機會in下人，所以想喺度分享下本🐷做Interviewee同Interviewer嘅心得！
去搵工第一件事就當然要執好自己份CV先，我本身依樣唔叻，但係我識抄😂，同埋我有心機。唔同公司個JD（Job Description）都唔會一樣，所以要認真睇睇先。第一樣要睇就係要睇自己啱唔啱做同想唔想做，如果報得過就要細心留意佢想要咩人，再對住黎執個CV。而個CV我建議唔好太花巧（你in designer就可能要），用簡潔嘅point form就可以（重點係要令人易睇到你嘅資料）。人工我通常會定得比我想要嘅高一兩千，佢覺得你合適會同你傾，除非高得好唔合理，如果唔係佢唔會因為個你要求個數太高唔見你。
咁有面試機會時就要再睇睇個JD，要了解間公司係做咩同佢請你係做咩，諗下你有咩過住相關嘅經驗，同時上網睇返佢列咗出黎嘅required skill/tool/framework/library/software等等等。我自己就會好鍾意上網睇埋d programming interview question，有d係concept、有d係language、仲有d係algro，最好咩都要睇，由其係in大公司丫ibank丫嗰d好大機會問。當然中英文嘅自我介紹都一定要架啦（唔知做唔做普通話，中資銀行／投行好似要）。同時要了解見你嘅人係咩位，咁你就可以估下佢會問咩，例如team leader應係會問得technical d，manger會問你點handle d project/task等等等等。最後仲有就係記得搵地址！
好啦，到咗面試嗰日，記得早十分鐘左右到，唔好太早，因為會可能會麻煩到佢哋，十分鐘左右可以表示到你守時同埋你有十分鐘平伏心情，如果係夏天，你仲可以抺下汗同整理儀容！
開始面試啦，最緊要冷靜、冷靜同冷靜，唔會俾人大到同嚇親，要有自信，記住冇人係咩都識晒嘅！人哋問問題要有回應，要有眼神交流，要聽清潔人哋問咩。佢問咗d嘢你唔識嘅話你可以直接答唔識，但如果你識／用過類似嘅嘢的話，你可以同返個Interviewer講，你知咩咩咩同做過咩咩咩係類似嘅。俾人覺得你了解個concept、有sense同知道點去學返，咁樣好大機會都會有分加。當然要保持笑容啦～😁
我依家作為一個interviewer，我比較著重個人嘅
- 溝通能力：明唔明人哋問咩同佢係咪係達表到自己，由其是識唔識點去表達一d抽象嘅嘢（提示：你可以寫出黎或者俾個比喻）
- 分析能力：識唔識比較唔同design或者framework嘅好同唔好，幾時用邊隻咁
- 邏揖：個人講嘅嘢合唔合邏揖。通常叻嘅聰明嘅人思路比較好
- 學習能力：依個比較難睇得出，但你見佢做得一兩年嘢，但識好多嘢（design或者framework），咁佢應該有唔錯嘅自學能力。不過小心一點就係佢識都唔代表佢識用返出黎，但依點可以請咗佢之後慢慢教返佢
好似好多嘢好多要求咁，其實唔會expect要搵到個一百分嘅人先請，我只係列出某部分請人時會留意嘅地方。
丫，仲有一樣嘢，有d人會覺得interviewer問嘅問題唔清楚或者冇絕對答題，從而覺得個interviewer好差，其實可能有機會係個interviewer有唔好嘅地方。但問題唔清楚，你應該你verify返，試諗下你做嘢嗰時會唔會全部嘢清清楚楚？另外如果個問題冇絕對答題，依個時候就係展示你分析能力，你大可以將唔同嘅options講下再比較，甚至可以make一d合理嘅assumptions去答你個答案。
同時我遇過有Interviewer問咗一d錯嘅問題，咁嗰時最好唔好直斥其非，你首先要諗多次佢係咪真係錯，如果係，你可以客氣d話返俾佢知，以你嘅經驗／認知，應該係咁咁咁。如果唔小心自己搞錯咗就記得say sorry同thank you！
好啦，終於捱（享受？☺️）完個面試，通常個Interviewer會問你有冇嘢想問。依個時侯係可以令你加分嘅，例如問下條team有幾多人個，個工作環境係點丫咁，令到人覺得你係想融入佢哋。千祈千祈唔好追問你之前答嘅係啱定錯（我遇過😅），俾人感覺麻麻，因為思義不大（不過我唔知有冇Interviewer會鐘意人咁問，我就唔太有好感）。
有可能會有下幾輪面試，視乎間公司幾大，但要做嘅嘢都係大同小異，分別在每一輪會喺某一範籌問得好仔細。
以上只係本🐷嘅經驗分享，意在俾大家參考下。希望大家可以次次見工都有offer啦！
