祝大家雞年行大運！

今日係大年初二，本🐷喺度祝大家雞年行大運、身體健康、事事順景！

沉日初一仲忙過返工，朝早晨早就出咗去同親戚拜年，最後今朝四點先瞓。出咗黎返工之後就覺得新年好攰，同覺得少咗幾日假，同時我覺得依家嘅新年冇咗以前嗰種喜氣洋洋嘅感覺，究竟係個社會變咗、我變咗定大家都變咗？我搵唔到答案，亦冇深究到，不過凡事都有反思學習嘅價值。

話說隨住我老母年紀開始大，我亦開始對佢唔耐煩同不滿，但係沉日去探一個年紀好大嘅親戚時（九十幾仲依家有柏金遜），我見到我老母好人慈嘅一面，同時亦令我對老母改觀同自己覺得不孝😭。沉日上到去嗰時咁當然會講一大舊廢話，當時有好多個老親戚嘅仔女同孫喺度，咁我就同老母坐去個老親戚度傾下。不過其實唔係好溝通到，因為佢口齒不清之餘仲好恍惚。當然我都唔知點好，就咁坐喺度，而我老母就喺當時幫佢按摩同好似氹小朋友咁都佢傾計。嗰下我自己好慚愧，我都大都未試過對我老母咁，同埋近年我已經覺得我老母多咗好多好多白頭髮，唉，我仲成日自己講要對老母好d，原來自己都係得把口😭。

之後就轉戰咗去另一班比較熟嘅親戚度拜年，咁去度傾咗陣，佢哋就話賭下錢，咁我不時就唔賭，係會買下六合彩咁。沉日就一開始玩廿一點，但因為人唔多，做莊嘅成日輸，之後就轉咗麻雀。我自己就試少少，咁就同佢地玩下咁，咁玩下玩下就發覺點解有人話麻雀係國術🤣，佢真係好多變化同䇿略，我好認真玩咁玩咗陣個腦已經好攰，又要記人打過咩，又要計機率，仲要估人哋要咩有咩唔可以打出去。如是姐打咗兩圈，我終於開到糊😎，雖然最後都係輸錢（輸人自摸），但只係十蚊。同時我發覺人嘅性格影響好闊，喺打麻雀嘅過程入邊，好多時我會選擇保守䇿略，所以我冇出統過，但同時食得一鋪咁多。其他我以前已經想進取d，但點解我都咁保守呢？我仲記得係因係我細嗰時成日做錯決定，以前我係好進取嘅😂，但衰過太多就變咗保守。似乎今年要不斷提自己唔好次次都咁保守，要喺適當時侯進取返！

因為要出門了，講住咁多先，再次喺度祝大家萬事如意，恭喜恭喜😄